Кешбэк қалай жұмыс істейді?
Ол төлем үшін ақшаны кім қайтаратынына байланысты болады.
Дүкен ұсынатын кешбэк. Сатушы өз ақшасынан клиенттің шотына немесе картасына сатып алу сомасынан пайызын аударады. Бұл кәсіпкерге тиімсіз болып көрінеді. Бірақ кешбэк пайданы арттыруға көмектеседі.
Кешбэк қызметтері сатушылар мен сатып алушылар арасындағы делдал болып табылады. Оларға әртүрлі интернет-дүкендермен және маркетплейстермен жұмыс жасайтын арнайы сайттар мен қосымшалар жатады. Онда сатушы-серіктестердің көптеген тауарлары бар. Сатып алушы өзіне қажетті тауарды таңдап, төлемді кешбэк-сервис арқылы жасайды. Бұл ақшаның бір бөлігін делдал клиенттің банк картасына, электрондық әмиянына немесе ұялы телефон нөміріне қайтарады.
Дүкендерге кешбэк-сервистермен серіктес болған тиімді, өйткені клиенттердің саны артады. Ал кешбэк-сервистер өз қызметтері үшін комиссия алады. Сол ақшадан сатып алушыларға пайыз төленеді.
Бірақ көбінесе кешбэкті банк төлейді. Клиент кредит немесе дебет картасын ресімдеп, онымен супермаркеттерде, мейрамханаларда, жанармай құю станцияларында, интернет-дүкендерде төлем жасайды. Біраз уақыттан кейін (мысалы, айдың соңында) банк осы картаға жұмсалған ақшадан пайыз аударады.
Кешбэк интерчейндж арқылы түскен пайдадан есептеледі. Интерчейндж - бұл қаржы ұйымдары арасында комиссия алмасу жүйесі. Бұл процесс келесідей өтеді:
- Клиент картамен төлейді.
- Төлем сатушыда есеп айырысу шоты ашылған эквайер банк арқылы жүзеге асырылады. Бұл төлемдерге қызмет көрсету үшін дүкен банкке комиссия төлейді.
- Банк-эквайер оның бір бөлігін сатып алушының картасын шығарған эмитент-банкке аударады. Бұл ақшадан кешбэк есептеледі.
Банк өз капиталын арттыру үшін кешбэктерді қолданады. Сонымен қатар банктер дүкендерден және басқа тауарлар мен қызметтерді жеткізушілерден комиссия алады. Банк клиенттерге кешбэк төлей отырып, ештеңе жоғалтпайды.
Сондықтан кешбэк өте тиімді. Одан дүкендер де, банктер де, кешбэк-сервистер де пайда көреді. Ал сатып алушыларда күн сайын ақша үнемдеу мүмкіндігі бар.
Кешбэк түрлері
Банктердің кешбэк бағдарламалары шарттар мен пайыздық мөлшерлемеге байланысты әртүрлі болады. Негізінен үш схема қолданылады.
Белгіленген мөлшерлемесі бар кешбэк. Әдетте, ол 1-2%-ды құрайды, бірақ ақша әр сатып алудан түседі.
Прогрессивті мөлшерлемесі бар кешбэк. Кешбэк мөлшері карта шығындарына байланысты өседі. Мысалы, егер сіз бір ай ішінде 150 мың ₸ жұмсаған болсаңыз, онда мөлшерлеме 1%-дан 2%-ға дейін, ал 200 мың ₸ жұмсасаңыз, онда 3%-ға дейін көтеріледі.
Шығындар түрі бойынша мөлшерлемесі бар кешбэк. Банк сатып алудың белгілі бір санаттарына жоғары кешбэк есептейді. Мысалы, медициналық қызметтер үшін төлем жасаудан картаға 5%, ал қалған төлемдерден тек 1% қайтарылады. Жеңілдікті санаттар өзгеріп отырады, сондықтан клиент өзіне тиімді санатты таңдай алады.
Көбінесе банктер кешбэктің біріктірілген схемаларын пайдаланады. Мысалы, Home Credit Банкінің Home Card Lite дебет картасыhttps://home.kz/debit-cards/HomeCard-Lite бойынша барлық шығындарға 1% тұрақты кешбэк, ал супермаркеттерде, коммуналдық төлемдер мен жанармай құю станцияларында төлем жасау үшін 5% есептеледі. Сонымен қатар карта ресімделген сәттен бастап алғашқы 90 күнде осы санаттарда 10% жоғары кешбэк есептеледі. Оған қоса ай сайын клиенттер дауыс беру арқылы 10% есептелетін қосымша санатты таңдайды. 2024 жылдың қаңтарында бұл стоматологиялық қызметтер болды. |
Кейбір банктер мен кешбэк-сервистер ақшаның орнына клиенттерге бонустық балдарды қайтарады. Оларды серіктес дүкендерде төлем жасауға немесе белгіленген бағам бойынша теңгеге айырбастауға болады.
Кейде кешбэктің жекелеген түрлеріне авиакомпаниялар ұсынатын бонустық мильдер және тіпті тегін тауарлар мен қызметтер кіреді. Бірақ іс жүзінде бұл кешбэк емес, өйткені кешбэк ақшаның қайтарылуын білдіреді.
Кешбэктен максимум пайда алу жолдары
Кешбэк — бұл ыңғайлы әрі пайдалы құрал, бірақ оны дұрыс пайдалану керек. Пайданы барынша арттыру үшін келесі кеңестерді ұсынамыз.
👛Ақшаны тек кешбэк алу үшін жұмсамаңыз. Жеңілдік қаншалықты тиімді болып көрінсе де, қажетсіз тауарды немесе қызметті сатып алу дұрыс емес.
👛Қосымша шарттарға назар аударыңыз. Кейбір банктер кешбэкті бір ай ішіндегі шығындар белгілі бір шектен, мысалы, 100 мың теңгеден асқаннан кейін ғана төлейді. Кейбір жағдайларда ақша тек белгілі бір сома мөлшеріндегі шығындардан қайтарылады. Егер сіз картаны сирек қолдансаңыз немесе үлкен сатып алулар жасамасаңыз, мұндай шарттарға келісудің қажеті жоқ.
👛Тегін қызмет көрсетілетін карта ресімдеңіз: қосымша шығындар кешбэк мөлшерінен артық болуы мүмкін.
👛 Сізге қажетті санаттарды таңдаңыз. Егер сізде көлік бар болса, онда жанармай құю станцияларында төлем жасау үшін жоғары кешбэк алу тиімді болады. Егер сізде көлік болмаса, басқа санатты, мысалы таксиді таңдаған дұрыс.
👛 Достарыңыз үшін төлеңіз. Мысалы, егер сіз достармен мейрамханада болсаңыз, шотты өз картаңыздан төлеңіз. Сіз үлкен сомадан кешбэк аласыз, ал достарыңыз сізге ақшаны қайтарады.
👛Акцияларды өткізіп алмаңыз. Эмитент-банктің мобильді қосымшасын орнатып, арнайы ұсыныстардан хабардар болыңыз.
