2025 жылғы 31 қазанда Қазақстан Республикасының Қаржы нарығын реттеу және дамыту агенттігі (ҚНРДА) «ForteBank» АҚ-ға «Home Credit Bank» АҚ-ны және банк экожүйесіне қызмет көрсететін «HomeITTech» ЖШС технологиялық компаниясын еншілес ұйымдар ретінде сатып алуға ресми түрде рұқсат берді.
Бұған дейін, ағымдағы жылдың маусым айында, ForteBank пен Home Credit Bank «Home Credit Bank» АҚ-ның 100% акцияларын сатып алу жөнінде келісімге келген болатын.
«Бұл рұқсаттар бізде сатып алу процесін аяқтауға мүмкіндік береді. Біз мәміленің екі тарап үшін де тиімді болатынына сенімдіміз: ForteBank өз технологиялық мүмкіндіктерін кеңейтіп, нарықтағы позициясын нығайтады, ал Home Credit Bank қаржыландырудың тұрақтылығын арттырып, жаңа даму мүмкіндіктерін ашады», – деді ForteBank-тің Басқарма Төрағасы Талгат Куанышев.
«Мәміле жоспарға сәйкес жүргізілуде. Бұған дейін бірнеше рет айтқанымдай, Home Credit Bank үшін Қазақстанда ең лайық акционер – ForteBank. Бұл мәміле екі банктің клиенттері мен серіктестері үшін тиімді нәтижелер әкеледі деп сенемін», – деді Home Credit Bank-тің Басқарма Төрағасы Кирил Бачваров.
«Home Credit Bank» АҚ өз қызметін қалыпты тәртіпте жалғастырады. Банк клиенттер алдындағы барлық міндеттемелерін толық көлемде орындауда, ал өнімдер мен қызметтер бұрынғы шарттар бойынша қолжетімді болып қала береді.