Чех банкі Ұлттық Банктен QR бойынша бірыңғай төлем жүйесін күтпей, бұл бағытта алғашқы қадамын жасады.
Банкте қандай жаңалықтар бар?
Home Credit Bank Kaspi QR төлем әдісін іске қосты. Қыркүйек айының соңына дейін бұл қызмет банктің барлық клиенттеріне қолжетімді болады.
Kaspi QR арқылы қалай төлеуге болады?
Бұл төлем әдісі тек Home.kz жаңа қосымшасында қолжетімді. Ол үшін Android немесе iOS-қа жаңа қосымшаны жүктеу керек. Төлем жасау үшін қосымшаның басты бетінде Kaspi QR «белгішесін» таңдап, QR–кодты сканерлеп, «төлеу» батырмасын басу керек.
Төлемдерді Kaspi QR орнатылған сауда нүктелерінде жасауға болады. Қазақстан бойынша барлығы 700 мыңнан астам төлем қабылдау нүктесі бар.
Төлем бойынша нұсқаулық
BES.media жаңа қызметтің жұмысын тексеріп, видеода Home.kz қосымшасында Kaspi QR арқылы қалай төлем жасауға болатынын айтты.
Kaspi QR арқылы төлем бойынша есептелетін кешбэктер
Kaspi QR арқылы төлей отырып, қызметті пайдаланудың алғашқы үш айында клиенттерге 1% кешбек есептеледі.
Ал жоғары кешбек алу үшін Home Credit Bank карталарымен төлеу қажет болады.
Бірыңғай QR
Қазақстанда бірыңғай QR енгізу туралы бірнеше жылдан бері айтылып келеді. 2022 жылы бұл жүйе талқыланып, оны енгізу жоспарланған болатын. Сол кезде бұл жүйе туралы сауда және интеграция саласы бойынша бұрынғы вице-министр Асель Жанасова айтып берді. Содан кейін 2024 жылдың ақпан айында Ұлттық банк басшысы Тимур Сулейменов жүйе осы жылдың соңына дейін жұмыс істейтінін хабарлады. Көптен күткен жүйені іске қосу туралы соңғы болып Ұлттық Банктің "Ұлттық төлем корпорациясы" АҚ Басқарма төрағасы Бинур Жаленов айтты. Ол бірыңғай QR 2025 жылдың бірінші жартысында іске қосылады деп хабарлаған болатын. Жүйенің енгізілуін күтпестен, екінші деңгейдегі банктер бір-бірінің қызметтеріне дербес түрде интеграциялануды бастады.
Осылайша Home Credit Bank Kaspi QR төлем жүйесін қосты
Home Credit Bank картасымен Kaspi QR арқылы төлеу Open API технологиясының арқасында мүмкін болды. Ұлттық Банк Төрағасы Тимур Сулейменов жоба 2024 жылдың 1 шілдесінен бастап іске қосылатынын айтты. Open API пайдаланушыларға көптеген шоттарды басқаруға және төлемдер мен аударымдар жасауға, қаржылық есептілікті оңтайландыруға, кірістер мен шығыстарды бақылауға мүмкіндік береді. Сонымен қатар бұл технология кез келген банктің қосымшасы арқылы банктік шотты пайдалану мүмкіндігін ұсынады